एमालेको दमक नगर अधिवेशन तय

दमकः नेकपा एमालेको १० औं दमक नगर अधिवेशन तय भएको छ । आगामी जेठ २८ र २९ गते नगर अधिवेशन गर्ने तय भएको हो । शनिबार बसेको नगर कमिटी बैठकले अधिवेशन गर्ने निर्णय गर्दै विभिन्न समितिहरु पनि गठन गरेको छ । 

अधिवेशनको पार्टी अध्यक्ष केपी शर्मा ओलीले उद्घाटन गर्ने जनाइएको छ । अधिवेशन सम्पन्न गर्न प्रतिनिधि व्यवस्थापन र राजनीतिक प्रतिवेदन तयारी समितिको संयोजक गेहनाथ पोखरेललाई तोकिएको छ ।  

त्यसैगरी लोकबहादुर अधिकारीको संयोजकत्वमा कार्यक्रम व्यवस्थापन उपसमिति, इन्द्र गुरुङको संयोजकत्वमा स्वम्सेवक उपसमिति, गेहनाथ पोखरेलको संयोजकत्वमा राजनीतिक प्रतिवेदन उपसमिति, राम बिष्टको संयोजकत्वमा सांस्कृतिक उपसमिति र चन्द्रप्रसाद गुरागाईंको संयोकत्वमा प्रचारप्रसार उपसमिति गठन गरिएको पार्टीले जनाएको छ । 

अधिवेशनका लागि खुल्लातर्फ ७, महिलातर्फ ४ र दलिततर्फ ३ संगठित सदस्य बराबर १ जना प्रतिनिधि छनौट हुने नगर कमिटी सदस्य महेश घिमिरेले जानकारी दिए । नगरमा १ हजार ३ सय ३८ संगठित सदस्य रहेको जनाइएको छ । आगामी जेठ २१ गते    प्रतिनिधि छनौट गरिने त्यसका लागि प्रत्येक वडामा निर्वाचन केन्द्र रहनेछन् ।