सोनाक्षी र मलाईकासँगै नेपाली कलाकारले राजधानी तताउने

काठमाडौं, वैशाख २३ । नेपालमा बलिउड कलाकारको आगमन पछिल्लो समय निकै बढ्न थालेको छ । विभिन्न कार्यक्रममा सहभागी हुनका लागि बलिउड कलाकार नेपाल आउने क्रम बढ्दो छ । यसै क्रममा बलिउड नायिका सोनाक्षी सिन्हा र मलाइका अरोरा खान काठमाडौं आउँदैछन् ।

उनीहरु सैनिक श्रीमती संघले आयोजना गर्न लागेको कार्यक्रममा सहभागी हुन काठमाडौं आउने भएका हुन् ।

यही मे १४ मा राजधानीको टुँडिखेलमा आयोजना हुने च्यारिटी शो ‘अमरपंक्षी’मा सांगितिक कार्यक्रम प्रस्तुत गर्न बलिउड नायिकाद्वय काठमाडौं आउने भएका हुन् । भूकम्प पीडितको सहयोगार्थ सैनिक श्रीमती संघले कार्यक्रम आयोजना गर्न लागेको हो ।

सो कार्यक्रममा बलिउड नायिकाद्वयका साथमा नेपाली कलाकारले पनि सांगितिक कार्यक्रम प्रस्तुत गर्नेछन् ।

नेपाली कलाकारहरु रेखा थापा, प्रियंका कार्की, ऋचा शर्मा, केकी अधिकारी, सुष्मा कार्की, निशा अधिकारी, सहाना बज्राचार्य, इन्दिरा जोशी लगायतको सांगितिक कार्यक्रम ‘अमरपंक्षी’को आकर्षण बन्ने जनाइएको छ ।

दिउँसो ३ बजेदेखि सुरु हुने कार्यक्रमका लागि टिकटको व्यवस्था अनलाईन तथा एसएमएसमार्फत गरिएको आयोजकले जनाएको छ ।